“ЭХ ТҮҮХЭЭ ТАНИН МЭДЭХ АЯЛАЛ” эх орончдийн өдрийг тохиодуулан музей үзэх аялал

Боловсрол соёл, шинжлэх ухаан, спортын яамнаас гаргасан “Нийгэмд ээлтэй музей, Монголоо танин мэдье” уриан дор үнэ төлбөргүй музей үзэх аяныг  орон даяар зохион байгуулагдсан билээ. Энэ уриан дор төвийн залуустаа Монголын түүх, үндэсний бахархал, зан заншил болон уламжлалт соёлыг таниулах зорилготой музей үзэх аяллыг зохион байгууллаа. Музей бүр өөрийн онцлогийг харуулсан тусгай үзүүлэн гаргаж иргэдэд үйлчилж байсан ба төвийнхөө 15 залууст Маршал Г.К Жуковын музей, Улаанбаатар хотын музейг үзүүлж сонирхуулсан юм.

 “Эх орончдын өдөр”-ийг тохиолдуулан Маршал Г.К Жуковын музейг үзэж байгаад тус музейн хамт олон онцгойлон талархаж байсан юм. Г.К Жуков нь 1939 оны 7-р сарын 11-нд түүнийг 57-р корпусын командлагчаар томилогдон ажиллаж гарамгай гавьяа байгуулсан монгол улсын баатар хүн юм.

Мөн төрөлх хотынхөө түүхээс танин мэдэх зорилгоор Улаанбаатар хотын музейг үзэж танилцлаа. Уг музей нь 1956 онд “Улаанбаатар хотын түүхийн үзэсгэлэн” нэртэйгээр байгуулагджээ. Үзэсгэлэнг анх 1956 оны 7-р сарын 9-нд нээхэд Улаанбаатар хотын захиргааны дарга Лхамжав үг хэлж тууз хайчилан нээлтээ хийж байсан түүхтэй музей юм. Улаанбаатар хотын музей нь Улаанбаатар хотыг түүхэн хөгжлийн үечлэлээр нь Нүүдлийн Өргөө, Их хүрээний үе /1639-1778 он/, Их хүрээ хот /1778-1911 он/ , Нийслэл хүрээний үе /1911-1924 он/, Улаанбаатар хотын үе /1924-1990 он/, /1990 оноос хойш/ хэмээн хуваан үзэж, үзүүлэнгийн гурван танхимаар үзмэрээ дэлгэн үзүүлдэг. Тус музей анх байгуулагдсан 1956 оноос хойш 1960, 1971, 1974, 1995, 2011 онуудад нийт 5 удаа үзүүлэнгийн зохион байгуулалтаа шинэчилж байжээ. Өнөөдөр музейн сан хөмрөг 3300 гаруй үзмэртэйгээс үзүүлэнгийн танхимд нийт үзмэрийн гуравны нэг нь тавигдаж үзэгчдийн хүртээл болж байгаа юм байна.

Дээрх музейнүүдийг үзэж сонирхосноор залуус Монголынхоо болон төрөлх хотынхоо түүх соёлоос суралцаж мэдлэг мэдээллээ нэмэгдүүлсэн юм.

“БАЯНЗҮРХ ДҮҮРГИЙН нутгийн захиргааны байгууллагууд, төрийн үйлчилгээний байгууллагуудтай ТАНИЛЦАХ АЯЛАЛ” өдөрлөг

Залуучуудын төвөөс санаачлан Баянзүрх дүүргийн Иргэдийн Төлөөлөгчдийн Хурлын Тэргүүлэгчдийн Ажлын албаны Сургалт сурталчилгааны хэлтэс, Баянзүрх дүүргийн Хөдөлмөр, Халамжын хэлтэстэй хамтран дүүргийн алба хэлтэсүүдтэй танилцах, үйл ажиллагааг нь залуустаа танилцуулах, сурталчлах нээлттэй өдрийг  зохион байгууллаа.

Уг үйл ажиллагаанд Залуучуудын төвд амьдарч сурч хүмүүжиж байгаа 18-19 насны 28 залуу оролцож Баянзүрх дүүргийн Хөдөлмөр, Халамжын хэлтэсийн хяналтын албаны дарга н.Лхамхүү,  ИТХ-ын Ажлын албаны ЗХХ-ийн дарга Б.Одбаяр нар байгууллагын бүтэц зохион байгуулалт болон үйл ажиллагааны талаар танилцуулга хийж залуучуудын сонирхосон асуултанд хариуллаа.

Харъяа дүүргийнхээ төрийн байгууллагуудаас иргэн хүний хувьд ямар үйлчилгээг хэрхэн авдаг талаар тодорхой ойлголт мэдээллийг авч төрийн үйлчилгээ ямар зохион байгуулалтаар хэрхэн хэрэгжиж байгааг өөрсдийн нүдээр харж бодит мэдээллийг авсан үр дүнтэй ажил боллоо.

Нийгмийн амьдралд оролцон бие даан амьдрахаар бэлтгэгдэж байгаа нийгмийн эмзэг бүлгийн залууст төрийн үйлчилгээний талаар мэдлэг олгох ач холбогдолотой ажлыг зохион байгуулж  тэдний мэдлэгт үнэтэй хувь нэмэр оруулсан  Баянзүрх дүүргийн Хөдөлмөр, Халамжын хэлтэс, ИТХ-ын Ажлын албаны хамт олонд талархалаа илэрхийлэн Цогцолборын “Талархал”-ыг  гардуулан өгсөн.

Бидний хүсэлтийг хүлээн авч үйл ажиллагааг зохион байгуулсан болон цаашид хамтран ажиллахаар санал солилцсон тус байгууллагын хамт олонд талархалаа илэрхийлж та бүхний цаашдын ажилд өндөр амжилт хүсье.

“Залуусын нөхөрлөл” өдөрлөг

Залуучуудын төвийн залуучууд ХСИС-ийн сэтгэл зүйн тэнхимийн оюутнуудтай хамтран Олон улсын эмэгтэйчүүдийн өдөрт зориулсан нөхөрлөлийн өдөрлөгийг амжилттай зохион байгууллаа.

Өдөрлөгт төвийн залуучууд болон багш нар, ХСИС-ын сэтгэлзүйн тэнхимийн 2-р курсийн оюутнууд тэнхимийн эрхлэгч О.Нэмэхханд, сэтгэлзүйн дадлагажигч багш нар оролцсон ба тэнхимийн эрхлэгч О.Нэмэхханд нийт охид эмэгтэйчүүдэд баярын мэндчилгээг дэвшүүлж өөрийн сургуулийн үйл ажиллагаа, онцлогийг залууст танилцуулан цаашдын хамтын ажиллагаа улам өргөжихийг хүсэн ерөөсөн.

Өдөрлөгийн үеэр оюутнууд болон залуучууд харилцан мэндчилгээ дэвшүүлж, хөгжөөнт тоглоом тоглон, англи, орос хэлээр дуу дуулж, шүлэг уншин бүжиглэж, хоорондоо танилцан нөхөрлөж нэг өдрийг хөгжилтэй өнгөрүүллээ.  

Тус өдөрлөгийг санаачилсан оюутнууд цаашид үр дүнтэй олон ажлуудыг хамтран хийхээр төлөвлөж буйгаа ярьж, өнөөдрийн үйл ажиллагаанд сэтгэл ханамжтай байгаагаа илэрхийлсэн юм.

Өдөрлөгийг хамтран зохион байгуулсан ХСИС-ийн багш оюутнууддаа сурлагын өндөр амжилт хүсье!